Fáa nú tilboð um Karlstad-ráðgeving

Nú verður møguligt hjá øllum avvarðandi hjá børnum og ungum við Downs syndromi at fáa Karlstad-ráðgeving.

Tað sigur landsstýrismaðurin í barna- og útbúgvingarmálaráðnum.

Hann kunnaði í gjár allar avvarðandi partar um tær tænastur í mál- og samskiftismenning, sum nú verða latnar øllum undir 18 ár, sum hava Downs syndrom.

Talan er um tænastur, sum Sernám veitir beinleiðis, umframt tvær tænastur, sum verða veittar umvegis Sernám frá privatum.

Talan er tó um eina fyribils loysn.

Arbeitt verður við at finna eina langtíðarloysn fyri øll børn og ung við mál- og samskiftistrupulleikum, sama hvønn tørv og hvørja avbjóðing, tey hava, sigur landsstýrismaðurin. 

Hann sigur, at Barna- og útbúgvingarmálaráðið hevur tosað við Almanna- og mentamálaráðið um, hvussu hetta økið kundi verið skipað betur.