Uttanríkisráðið einki at vita um amerikanskt hernaðarflogfar

Hvørki Uttanríkisráðið ella Arktisk Kommando fingu nakra fráboðan ella kunning, áðrenn eitt fremmant hernaðarflogfar í gjár fleyg lágt millum oyggjarnar.

Tað váttar Høgni Hoydal, landsstýrismaður í uttanríkismálum, fyri Vágaportalinum.

Millum annað var flogfarið at síggja yvir Havnini og inni á Skálafjørðinum, og í gjár sóust hópin av myndum og upptøkum av tí á sosialu miðlunum, so mong løgdu tað til merkis.

Høgni Hoydal sigur, at talan var um eitt amerikanskt hernaðarflogfar, og at tey hava diplomatiskt loyvi at flúgva í føroyskum loftrúmi.

- Men vit hava biðið um, at fráboðan kemur áðrenn, so vit kunnu senda kunning til føroyingar, sigur hann við.

- Tað er ikki hent her - hvørki til Uttanríkisráðið ella til Arktisk Kommando. Og tað eigur ikki at koma fyri, sigur Høgni Hoydal, ið ætlar at geva boð um hetta á røttum stað.