Etna farið at goysa

Øll flogferðsla til og av flogvøllinum í Catania á oynni Sisilia í Italia er steðgað, eftir at gosfjallið Etna fór at goysa í nátt. Flogferðslan er fyribils steðgað fram til klokkan 19 í kvøld.

Harumframt hevur borgarstjórin í Catania, Enrico Trantino, bannað allari ferðslu við motorsúkklum og súkklum næstu 48 tímarnar. Og bilar mugu ikki koyra skjótari enn 30 km/t.

Orsøkin er, at øska frá gosinum hevur lagt seg á vegirnar, sum av tí sama gerast sera hálir.

Etna er 3.324 metrar høgt og er hægsta virkna gosfjall í Evropa. Har goysir ofta, men seinasta stóra gosið var í 1992, skrivar DR.