Løgmaður: 10 milliónir krónur í neyðhjálp til Ukraina næsta ár

Aksel V. Johannesen, løgmaður, og Bjørt Samuelsen, løgtingsforkvinna, fingu møguleikan at bera ukrainska forsetanum, Volodymyr Zelenskyj, og ukrainska fólkinum eina kvøðu, tá tey í dag vóru við til almennu vitjanini hjá Volodymyr Zelenskyj og konu hansara á Christiansborg. 

"Tað hugtók meg, at hann segði í sínari røðu, at vit kunnu heldur missa eitt sindur av pengum enn at missa andlit yvir fyri russum," segði Aksel V. Johannesen, løgmaður. 

Volodomir Zelenskyj, Bjørt Samuelsen

 Volodymyr Zelenskyj helt tríggjar røður á síni vitjan í fólkatinginum í dag, eina uttanfyri, eina innanfyri og eina til døgurðan. 

"Tað vóru tríggjar ymiskar røður, har boðskapurin var nøkurlunda tað sami, at russar ætla sær víðari, um Ukraina fellir."

Volodomir Zelenskyj, Bjørt Samuelsen

Aksel V. Johannesen, løgmaður, og Bjørt Samuelsen, løgtingsforkvinna, fingu møguleikan at heilsa upp á Zelenskyj tíðliga í morgun, og tey bæði vissaðu hann um, at føroyska fólki kennir við ukrainska fólkinum. 

"Vit greiddu honum eisini frá, at vit hava tikið móti ukrainskum flóttafólkum, og at vit hava gjørt okkara besta fyri, at tey skulu hava tað gott í Føroyum," greiddi løgmaður frá.