Havsbrún setur met í ár

Havsbrún fer at hava eitt metár í ár.

Tað sigur Bakkafrost, sum eigur Havsbrún.

Havbrún fer væntandi at gera meira mjøl og lýsi í ár enn nakað annað ár.

Virkið fer at selja 130.000 tons av alifóðri í ár. Meginparturin verður seldur í Føroyum og í Skotlandi.

128 mió. í avlopi

Rakstrarúrslitið hjá Havsbrún var 128 mió. kr. í øðrum ársfjórðingi.

Tað var 119 mió. kr. í øðrum ársfjórðingi í fjør.

Tilmælið hjá ICES um svartkjaft, sum Havsbrún brúkar til alifóður, er 81 prosent størri enn í fjør.

Rakstrarúrslitið hjá Bakkafrost-samtakinum fyri annan ársfjórðing er 353 milliónir krónur. Tað var 587 milliónir krónur í øðrum ársfjórðingi í fjør. 

Úrslitið eftir skatt var hall, 123 mió.kr. Tað var avlop, 845 mió.kr., í fjør.

Lægri prísur

Laksaprísurin í norskum krónum í øðrum ársfjórðingi var eitt prosent hægri enn í øðrum ársfjórðingi í fjør.

Men av tí at norska krónan er so veik, var prísurin 15 prosent lægri í evrum.