Vænta størri útboð av laksi seinna hálvár

Í seinnu helvt í ár verður altjóða útboðið av alilaksi tvey til trý prosent størri enn í seinna hálvári í fjør.

Í øllum 2023 veksur útboðið væntandi tvey prosent, sama hvørjar goymslubroytingarnar vera. 

Tað sigur Bakkafrost, sum hevur norska Kontali Analyse sum keldu.

Í øðrum ársfjórðingi í ár vaks útboðið bara 0,3 prosent sammett við í fjør.

Við goymslubroytingum vaks útboðið okkurt um 0,9 prosent í ársfjórðinginum.

Fyrra hálvár 2024 veksur útboðið væntandi trý prosent samanborið við fyrra hálvár í ár.

Bakkafrost selur laks til lond í Evropa, til USA og Fjareystur.

Eftir russisku innrásina í Ukraina gavst Bakkafrost við øllum handli við Russland.