Norska matvørueftirlitið gevur SalMar bót

Norska matvørueftirlitið hevur givið alifyritøkuni SalMar eina bót upp á 1,7 milliónir norskar krónur - tað svarar til 1,1 millión krónur í okkara gjaldoyra.

Hetta er tað mesta, matvørureftirlitið kann geva í bót.

Orsøkin er stórar nøgdir av deyðum og illa sjúkum fiski í ringunum.

NRK skrivar, at talan er um alibrúkið Hjortøya á Trøndelagstrondini, har SalMar í staðin fyri at taka tann deyða og sjúka fiskin hevur latið hann livað við teimum líðingum, sum fylgja við.

Hava ikki hugsað um vælferð

Í síni niðurstøðu sigur matvørueftirlitið millum annað, at "í hesum málinum er okkara meting, at tit hava lagt ov stóran dent á at minka um fíggjarligan miss, og hava ikki mett stór og opin sár á einum stórum tali av fiski sambært fiskavælferðini."

Tað var í apríl mánaði, at matvørueftirlitið var á ófráboðaðari vitjan á tíggju ymsum alibrúkum hjá fleiri ymiskum alifyritøkum.

Í alibrúkinum hjá SalMar fann matvørueftirlitið nógvan deyðan alilaks og eisini fisk við sonevndum vetrarsárum. Hesi sár koma ofta í sambandi við avlúsing.

Ósamdir, men rinda kortini

Matvørueftirlitið gav tá SalMar eitt greitt tilmæli, um at taka allan fiskin í tí eina ringinum, har 85 prosent høvdu sár, men fyritøkan lurtaði ikki eftir tilmælinum. 

SalMar sigur í tíðindaskrivi, at fyritøkan er sera ósamd við niðurstøðuni hjá matvørueftirlitinum um, at tað er grundarlag fyri at geva bót, men at fyritøkan fer kortini at rinda bótina.