Håkan í tvey ár afturat

Håkan Ericson verður venjari hjá føroysku landsliðsmonnunum í minst tvey ár afturat.

Tað kunngjørdi forsetin í Fótbóltssambandi Føroya, Christian Andreasen, á tíðindafundi fyrrapartin.

- Vit hava verið sera væl nøgd við hansara innsats. Spælararnir eru væl nøgdir, og umsitingin er væl nøgd við hansara arbeiði, segði Christian Andreasen, sum legði afturat, at tað er ein samd nevnd, sum hevur tikið avgerðina.

Nýggi sáttmálin merkir, at Håkan Ericson standa á odda fyri landsliðnum í Nations League-kappingini, sum byrjar í september í 2024, og í HM-undankappingini í 2025.

63 ára gamli sviin hevur verið venjari hjá Føroyum í fýra ár. Frammanundan hevði hann arbeitt fyri svenska fótbóltssambandið, har hann var við til at tryggja svenska U21-landsliðnum EM-gull í 2015.

Fyrsta kappingin undir leiðslu av Håkani Ericson var Nations League, sum Føroyar vann frammanfyri Malta, Lettland og Andorra.

Síðan var HM-undankapping á skránni. Føroyar vóru í bólki saman við Moldova, Ísrael, Eysturríki Skotlandi og Danmark, og hóast Føroyar spældi fleiri góðar dystir á heimavølli, eydnaðist bert at fáa fýra stig í dystunum ímóti Moldova.

Landsliðið var flutt upp í deild C í Nations League, og í 2022 vóru Litava, Luksemborg og Turkaland mótstøðulið. Ta ferðina eydnaðist at fáa triðja pláss við átta stigum, millum annað við minniligum sigri á Turkalandi á Tórsvølli.

Í løtuni er EM-undankapping í gongd, og eitt stig er komið til høldar í javnleiki ímóti Moldova.