Íslendskur hvalabátur sleppur aftur at skjóta

Íslendsku matvørumyndugleikarnir hava givið Hvali 8 loyvi til at skjóta hval aftur, men treytir eru, sum fyrst skulu lúkast, áðrenn loyvið verður givið.

Millum annað skal skjúttin prógva, at hann dugir at skjóta.

Íslendsku matvørumyndugleikarnir steðgaðu fyri einari viku síðani fyribils øðrum hvalabátinum, Hvali 8.

Hann hevði framt álvarsligt brot á lógina um djóravælferð, siga myndugleikarnir.

Doyði ikki

Hvalur 8 rakti ein nebbafisk so illa við fyrsta skotinum 7. september, at nebbafiskurin doyði ikki alt fyri eitt.

Tá slíkt hendir, eigur at vera skotið aftur í stundini, sigur lógin.

Men tað hendi ikki. Slakur hálvur tími gekk. Og tá gingu nakrir minuttir til hvalurin doyði.

Tað vóru júst hendingar sum hendan 7.september, sum gjørdu, at íslendska hvalaveiðan ikki fekk loyvi at byrja 21.juni, sum hon annars skuldi, men ikki fyrr enn 1.september.