Høvdavirkið víðkar virksemið

Høvdavirkið á Hagaleiti í Leirvík, sum síðani 2001 hevur turkað fiskahøvd, -ryggir og heilan fisk, fer nú at víðka virksemið.

Ætlanin er nú eisini at framleiða mjøl og lýsi úr feitum fiski og fiskaúrdrátti, og at skera flak av svartkjafti.

Hóast Høvdavirkið hesi árini hevur havt umhvørvisgóðkenning, hevur Umhvørvisstovan hildið tað verið neyðugt við nýggjari góðkenning, nú virkið víðkar virksemið.

Hesa umhvørvisgóðkenning hevur virkið í Leirvík fingið í vikuni, og í nýggju góðkenningini verða treytir settar til eitt nú spillivatn og útlát til luft.

Varðin í Gøtu eigur 86 prosent av Faroe Marine Products, sum er felagið aftan fyri Høvdavirkið.

Fyrrverandi stjórin, Eirikur á Húsamørk, sum nú er nevndarlimur í felagnum, eigur hini 14 prosentini.