Ísrael fyrireikar seg at senda herfólk inn í Gaza

Støðan millum Hamas og Ísrael stendur við og versnar. 

Seinastu dagarnar og tímarnar hevur Ísrael hert munandi um álopstilbúgvingina við hernaðarútgerð og herfólki á markinum millum Ísrael og Gaza. 

Ísrael hevur sent boð eftir 300.000 herfólkum aftrat.

- Tey nærkast Gazageiranum, har tey fyrireika seg til uppgávuna, sum tey hava fingið frá ísrelsku stjórnini. Vit skulu tryggja, at Hamas onga hermergi hevur eftir, tá kríggið er av, og ikki kann hótta ella drepa ísraelsk sivilfólk, sigur Jonathan Conricus, sum er talsmaður fyri ísrelska herin. 

Gaza, lík í Gaza

Stríðið millum Ísrael og Hamas hevur kravt í minsta lagi 2.400 mannalív, 1.200 í Gaza og 1.200 í Ísrael. (Mynd: Reuters/Ritzau Scanpix)

Kríggjast á landi

Ísrelski verjumálaráðharrin, Yoav Gallant, vitjaði í gjár ísrelsku herfólkini við á markinum til  Gaza. Hann segði, at skjótt verður farið inn í Gaza. 

- Vit byrjaðu við loftálopunum. Seinni fara vit at leypa á á landi, segði hann. 

Nýggjastu tølini frá palestinskum myndugleikum siga, at í minsta lagi 1.200 fólk hava latið lív av ísraelskum loftálopum. Ísrelskir myndugleikar hava boðað frá, at Hamas hevur dripið 1.200 ísraelar, skrivar danska kringvarpið.