Farmaskip stoyttu saman norðan fyri Týskland

Sjóferðslumyndugleikarnir í Týsklandi siga nú, at ein deyður sjómaður er funnin í Norðsjónum, og at tveir eru bjargaðir á lívi.

Tað var í morgun, at enska farmaskipið Verity og Polesie, sum er skrásett í Bahamas, stoyttu saman norðan fyri Týskland.

Enska skipið, sum var á veg úr Bremen til Immingham í Onglandi, sakk eftir hendingina, skrivar Ritzau.

Framvegis eru fýra sjómenn av enska skipinum ikki funnir. Eingin fekk skaða umborð á Polesie.

Fleiri skip og tyrlur eru við í bjargingini. Aldurnar har á leið eru í løtuni um tríggjar metrar, og einki er enn at frætta um, hví skipini stoyttu saman.