Riggaði ikki at ringja 112 eina løtu um middagsleitið

Um middagsleitið riggaði ikki at ringja hvørki 112 ella 114, sum er nýggja beinleiðis nummarið til politiið.

Erland Jensen, tøknileiðari á Føroya Tele, greiðir frá, at tað var sonevnda Nettal-skipanin hjá Føroya Tele, ið fór niður, sum tað eitur á tøknimáli. 

"Eina løtu um middagsleitið eru fólk ikki sloppin ígjøgnum, um tey hava ringt 112 ella 114. Tað hevur verið støðan inntil vit fingu sett í verk okkara back up-skipan við fartelefonum, sum liggja á politistøðini," greiðir Erland Jensen, tøknileiðari, frá. 

Føroya Tele

Nettalu-skipanin hjá Føroya Tele er ein skipan, ið Føroya Tele bjóðar vinnukundum, harundir eisini løgregluni. 

"Fyrr høvdu allir vinnukundar hjá Føroya Tele ein vekslara standandi hjá sær. Nú hava vit eina skipan her á Føroya Tele, ið eitur Nettala, sum stýrir hesari veksling fyri okkara kundar. Og tað var tann skipanin, ið fór niður. " 

Tøknileiðarin er, sum vera mann, ikki nøgdur við, at tað ikki hevur borið til at ringja 112 og 114 eina løtu. 

"Tað er als ikki nøktandi, at tað ikki riggaði at ringja 112. Vit eftirmeta hvat er hent saman við løgregluni, fyri at tryggja okkum at tað ikki hendir aftur," staðfestir Erland Jensen, tøknileiðari á Føroya Tele. 

Bæði 112 og 114 rigga aftur.