Hamas og Ísrael nærkast vápnahvíld

Hamas og Ísrael nærkast avtalu um vápnahvíld. 

Tað sigur ovasti politiski leiðarin í Hamas, Ismail Haniyeh.

- Hamas hevur sent sínar viðmerkingar til uppskotið um avtalu til embætisfólk í Katar, sigur Haniyeh í fráboðan til Reuters. 

Tíðindini um avtaluna eru ikki váttað enn, og ikki er greitt, nær tað verður.

Katar hevur týðandi diplomatiskan leiklut í krígnum millum Hamas og Ísrael. 

Meginparturin av leiðsluni í Hamas er í Qatar.

Ismail Haniyeh - Mynd: CNN

Ismail Haniyeh er politiskur leiðari í Hamas. (Mynd: CNN)

Í ljósmála

Í gjár segði amerikanski forsetin, Joe Biden, at ein avtala um vápnahvíld og at lata gíslar leysar, er í ljósmála.

Í fráboðanini frá Haniyeh stendur einki um, hvussu leingi vápnahvíldin verður, og heldur ikki, hvussu nógvir gíslar kunnu latast leysir.

Hernaðarligir palestinar í Gasageiranum hava í minsta lagi 237 sivilfólk og hermenn sum gíslar, eftir at hermenn hjá Hamas lupu á har suðuri í Ísrael 7. oktober. 

Fimm gíslar eru higartil latnir leysir.

Ísraelski forsætisráðharrin, Benjamin Netanyahu, hitti í gjárkvøldið familjur hjá fleiri gíslum.

- At fáa gíslarnar heim í øllum góðum er eitt 'heilagt mál', segði Netanyahu við familjurnar.