- Tíðindi, mentan og ítróttur
Mist 46 bingjur í Skagerak
Mist 46 bingjur í Skagerak
Eitt farmaskip hjá Maersk hevur mist 46 bingjur út í Skagerak, orsaka av ódnarveðrinum, sum hevur herjað í Danmark í vikuni.
Ein av 46 bingjunum, ið Maersk hevur mist. Hetta er ímillum Tranum og Slette strand
Mynd: Claus Bjørn Larsen/Ritzau Scanpix
23.12.2023 - 16:53
Eitt farmaskip hjá Maersk hevur mist 46 bingjur út í Skagerak í sambandi við ódnarveðrið, sum hevur herjað í Danmark í vikuni. Flestu av bingjunum flóta í økinum millum Hanstholm og Skagen, og eru tí í vanda fyri skipaferðsluna har.
Norrøna kom inn í Hirtshals um middagsleitið í dag. Men hon varð ikki darvað av bingjunum. Heldur ikki sóust nakrar bingjur á leiðini hjá Norrønu.
Tað var 400 metrar langa farmaskipið Mayview Maersk, sum misti tær 46 bingjurnar í ódnarveðrinum gjáramorgunin á veg úr Bremerhaven í Týsklandi til Gdansk í Pólandi.
Fýra av bingjunum eru riknar á land. Tríggjar sunnan fyri Blokhus í Vendsyssel og ein á Klim Strand.
Bingjurnar eru brotnaðar, og tí rekast frystiboksir, køliskáp, kanylir og annað á strondini.
Sambært løgregluni er tað at meta sum stuldur, um fólk taka sær nakran av lutunum, sum reka á land.
Danska sjóverjan ansar eftir, at skip ikki koma í vanda av bingjunum, sum eru truplar at síggja í sjónum.
Maersk sigur, at tey fara at hjálpa við arbeiðinum at fáa bingjurnar burtur.
Er kopiera
Nýggjastu sendingar í ÚV
Nýggjastu sendingar í SV
