15 yrkisútbúgvingar í føroyskum skúlum

Tá ið ræður um fjølbroytni á yrkisútbúgvingarøkinum, hevur tað týdning at vísa á, at Føroyar hava eitt rættiliga stórt útboð av yrkisútbúgvingum.

Í løtuni verða 15 ymiskar yrkisútbúgvingar bodnar út í føroyskum skúlum, tá ið allar sergreinir vera taldar við. Harumframt eru ein long røð av útbúgvingum, har lærupláss eru í Føroyum, meðan skúlagongdin verður tikin í donskum skúlum.

Djóni svarar Una

Hetta svarar Djóni Nolsøe Joensen, landsstýrismaðuri í barna- og útbúgvingarmálum, partamanni sínum, Una Holm Johannesen, løgtingsmanni, sum vil vita, hvussu landsstýrismaðurin ítøkiliga ætlar at uppraðfesta og fáa fjølbroyttari útboð av yrkis- og vinnurættaðum útbúgvingum.

Í øðrum lagi, hvussu landsstýrismaðurin arbeiðir við at styrkja vaksnamannútbúgvingar og eftirútbúgvingar.

Og í triðja lagi, hvussu hann ætlar at samskipa granskingararbeiðið betur.

Nýggjar útbúgvingar

Djóni Nolsøe Joensen svarar millum annað, at Barna- og útbúgvingarmálaráðið í næstum fer at viðgera nøkur tilmælir, sum snúgva seg um at seta nýggjar yrkisútbúgvingar á stovn.

Talan er eitt nú um eina læknaskrivaraútbúgving og eina yrkisútbúgving innan KT-support. 

At raðfesta er tó ikki altíð at stovna nýggj útbúgvingartilboð. Tað er eisini at hjúkla um tey tilboð, sum eru, og at menna útbúgvingarnar á ymsan hátt, sigur landsstýrismaðurin í svari sínum til fyrispurningin.