Nú kemur niðurstøða um kommunusamanlegging í Suðuroy

Arbeiðsbólkurin, sum var settur fyri umleið einum ári síðani at kanna fyrimunir og vansar við sjálvbodnari kommunusamanlegging í Suðuroynni, nærkast nú eini niðurstøðu.

Tað sigur Róin Schrøter í Hvalba, sum er formaður í bólkinum.

Hann vil tó ikki gera bandaða samrøðu, tí niðurstøðan er ikki endaliga liðug enn, men verður tað væntandi um fáar dagar.

Og áðrenn hann fer at siga nakað alment, skulu kommunustýrini síggja niðurstøðuna hjá bólkinum. 

Hann vil tó siga so mikið, at tað bæði eru fyrimunir og vansar við eini kommunusamanlegging, men ikki um tað eru fleiri fyrimunir enn vansar, ella øvugt.

Róin Schrøter

Frítekst tagging: 

Ítróttur

Fótbóltur

Róin Schrøter

Róin Schrøter hevur verið formaður í arbeiðsbólkinum. (Savnsmynd)

Allar kommunur ikki við

Tað var 6. september 2022, at Tvøroyar býráð samtykti einmælt at heimila Kristini Michelsen, borgarstjóra, at taka stig til at skipa fyri fundi við allar borgarstjórarnar í Suðuroynni, at viðgera uppskot um sjálvbodna kommunusamanlegging í oynni. 

Tvøroyrar býráð mælti til, at allar kommunurnar valdu limir í ein arbeiðsbólk, sum skuldi fremja lýsing av hvørjari kommunu sær, av fyrimunum og vansum við sjálvbodnari kommunusamanlegging. 
 
Síðani viðgjørdu øll sjey kommunustýrini í Suðuroynni uppskotið, men við ársenda 2022 høvdu bert Hvalbiar-, Fámjins- og Tvøroyrar kommunur samtykt at velja limir í arbeiðsbólkin.

Sostatt kom arbeiðsbókurin bert at fevna um tær tríggjar kommunurnar í Suðuroyar norðaru helvt.

Umboðini í bólkinum eru umframt Róin Schrøter, Ólavur Rasmussen, sum eisini umboðar Hvalbiar kommunu, Dorit Bjarkhamar og Herit Albinus vegna Tvøroyar kommunu, og Eyðdis Ellendersen og Niels Jacob Nielsen, sum umboða Fámjins kommunu.