Spillvatnsætlanin í Runavíkar kommunu kemur á mál næsta ár

Runavíkar kommuna kemur á mál við spillivatnsætlanini næsta ár.

Tað sigur kommunan á heimasíðuni.

Har stendur, at býráðið, sum tók við í 2013, staðfesti, at Runavíkar kommuna ongan veg var komin á økinum, hóast almennu krøvini vóru, at alt skuldi vera liðugt tvey ár seinri.  

Metingin tá var, at øll verkætlanin í teimum 15 bygdunum, fór at kosta omanfyri 90 milliónir krónur. 

Men so nógv fer ætlanin ikki at kosta, sigur býráðið nú. Valdu loysnirnar eru bíligari í rakstri og íløgum.

Átta bygdir avgreiddar

Átta bygdir eru avgreiddar. Tær eru Funningsfjørður, Oyndarfjørður, Skála, Søldarfjørður, Rituvík, Glyvrar, Elduvík og Saltangará. Skálafjørður verður avgreiddur í ár.

Nakrar miðalstórar verkætlanir eru eftir.

Í Runavík skal dagførast framvið Fjøruvegnum og gerast nýtt reinsiverk.

Í Æðuvík og í Lamba skulu havleiðingar ávikavist umvælast og gerast. Í Funningi er prosjekteringin liðug.

So er tvær bygdir eftir. Tær eru Skipanes og Lambareiði.