Vænta slakar 13 milliónir í halli á fíggjarlógini næsta ár

Fíggjarmálaráðið væntar, at fíggjarlógin næsta ár fer at hava 12,6 milliónir krónur í halli, eftir at átøk eru sett í verk.

Tað vísir uppskotið til samtyktar um játtanarkarmar fyri 2025, sum landsstýriskvinnan í fíggjarmálum, Ruth Vang, hevur lagt fyri tingið í dag.

Útreiðslukarmurin verður sjey milliardir og 537,4 milliónir kr. Framskrivaðu inntøkurnar verða sjey milliardir 546,6 milliónir kr.

Raksturin í 2025 verður mettur at kosta slakar sjey milliardir kr., og 600 milliónir fara til íløgur.

Átøk fyri 35 milliónir

Landsstýriskvinnan sigur, at ætlanin er at gera átøk 2025, so úrslitið batnar 35 milliónir kr.. Haraftrat verður arbeitt við at tryggja fíggjarliga haldførið.

Ætlanin er eisini at broyta uppgerðina av inntøkunum frá avgjøldum á tilfeingisvinnurnar soleiðis, at frá 2025 fer ein størri partur beinleiðis í Búskapargrunnin. Tað hevur við sær, at slakar 57 milliónir kr. vera á inntøkusíðuni á fíggjarlógini næsta ár.

Roknað verður við størri útreiðslum til m.a. heilsutrygdarveitingar, Landssjúkrahúsið, serviðgerðir uttanlands, arbeiðsfremjandi tiltøk og fólkapensjón.

Ruth Vang

Ruth Vang, landsstýriskvinna í fíggjarmálum. 

Arbeiði í gerð

Íløgurnar verða mettar til 600 mió. krónur næsta ár. Nógv av hesum eru íløgur til arbeiði, ið longu eru í gerð, t.d. Fróðskaparsetrið, tunnilin til Dals, miðnám á Kambsdali og KT-verkætlanir.

Átøk verða framd at tálma útreiðslur og hækka inntøkur hjá landskassanum

Arbeiðið at gera eitt fíggjarpolitiskt regluverk er byrjað, og neyðugt verður eitt nú at endurskoða pensjónsaldurin, sum Búskaparráðið hevur mælt til, sigur Fíggjarmálaráðið.

Les frágreiðing til játtanarkarmar her.