Svøríki: Fíggjarliga afturgongdin vendir í ár

Fíggjarliga afturgongdin í Svøríki vendir í ár.

Tað væntar svenski konjunkturstovnurin, KI. Hann roknar eisini við, at leiðandi rentan fer at lækka fýra ferðir í hesum árinum. 

Svenska bruttotjóðarúrtøkan hækkar  0,8 prosent í ár, spáa búskapargranskarar á stovninum, og inflatiónin minkar niður í 2,9 prosent.

- Afturgongdin rakar botnin í ár, og seint í hesum árinum kemur ferð á búskaparligu framgongdina, skrivar KI í tíðindaskrivi í dag.

Konjunkturstovnurin væntar, at svenski tjóðbankin fer at lækka leiðandi rentuna úr fýra prosentum, sum hon er í dag, niður í trý prosent í hesum árinum.

Áðrenn KI gjørdi sína forsøgn, vóru ábendingar um, at húsarhald í Svøríki og tænastugeirin eru bjartskygdari um búskapin nú, skrivar svenska kringvarpið SVT.