Jens Johan Dam nýggjur formaður í Betri

Tríggir av teimum seks nevndarlimunum í Betri stóðu fyri vali. Poula Michelsen varð afturvald.

Nýggj í nevndini eru Jens Johan Dam og Jákup Egholm Hansen.

Harumframt eru Mortan Simonsen, Petur Elias Nielsen og Tóra við Keldu í nevndini. Nevndin hevur skipað seg við Jens Johan Dam, sum formanni, og Poulu Michelsen sum næstforkvinnu.

Roknskapurin hjá Betri fyri 2023 vísir 381,9 milliónir kr. eftir skatt. Hetta er væl meira enn í 2022, tá ið avlopið var 27,9 milliónir kr. eftir skatt. Úrslitið er somuleiðis væl omanfyri tær 170-250 milliónir krónurnar, sum metingarnar fyri 2023 søgdu.

Høvuðsorsøkin til góða úrslitið hjá samtakinum er avkastið av virðisbrøvunum, ið gjørdist munandi betri enn væntað. Í 2022 rakti vánaliga gongdin á virðisbrævamarknaðinum samtakið meint, men í fjør góvu virðisbrøvini aftur eitt munagott íkast til úrslitið. Eisini var gott avkast av útlánsvirkseminum, boðar Betri frá í tíðindaskrivi.