Hitamet í Death Valley í Kalifornia: Miðalhitin í juli var 42,5 stig

Í Death Valley í Kalifornia, sum er heitasta stað á jarðarklótuni, hevur verið óvanliga heitt í juli í ár.

Miðalhitin í farna mánað var 42,5 stig, og tað er mesti miðalhiti higartil, sum er skrásettur nakrastaðni á jørðini, skrivar danska TV2.

Sambært National Park Service, sum rekur amerikansku tjóðlundirnar, hevur nógvi hitin í Death Valley kostað tvey mannalív í ár.

Hægsti hitin máldur í 1913

Mesti hitin í Death Valley í juli var 54 stig, og eisini um náttina hevur tað verið heitt, tí hitin fór ongantíð niður um 32 stig.

Mesti hiti, sum er máldur á jørðini, er eisini í Death Valley. Tað var í 1913, tá hitamátarin vísti 56,7 stig.

Orsøkin til, at tað verður so heitt í Death Valley er, at dalurin liggur so lágt - lægsta punktið er 86 metrar undir sjóvarmálanum - og er umgirdur av høgum fjøllum, so hann er at rokna sum ein grýta, har hitin savnast.