Rutte: Norðurkoreanskir hermenn eru í Russlandi

NATO-aðalskrivarin, Mark Rutte, váttar nú, at norðurkoreanskir hermenn longu eru komnir til Russlands.

Tað veit Reuters at siga.

- Eg kann vátta, at norðurkoreanskar herdeildir eru komnar til Russlands og eru til staðar í Kursk-økinum, verður Rutte endurgivin fyri at siga.

NATO-aðalskrivarin sigur, at hetta ger støðuna enn spentari í Ukraina, har Russland gjørdi innrás fyri meira enn hálvumtriðja ári síðani.

- Hetta er ein hóttan ímóti trygdini í Evropa, sigur Rutte, ið heitir á Russland og Norðurkorea um alt fyri eitt at gevast við sínum ólógliga virksemi.

Rutte dylir ikki fyri, at nýggjasta stigið hjá russum er tekin um, at russiski forsetin, Vladimir Putin, er bæði ráðaleysur og hættisligur.