Serskatturin á alivinnuna verður 12 prosent

Serskatturin á alivinnuna skal vera 12 prosent, og ikki átta prosent, sum samgongan og Sambandsflokkurin upprunaliga ætlaðu.

Ruth Vang, landsstýriskvinna í fíggjarmálum, hevur lagt fyri løgtingið lógaruppskot um eykaskatt á alifeløg.

Í semjuskjalinum millum teir tríggjar samgonguflokkarnar og Sambandsflokkin, undirskrivað 26. mars í ár, stendur at flokkarnier eru samdir um alifeløgini skulu gjalda ein eyka serskatt upp á átta prosent av skattskyldugu inntøkuni hjá feløgunum. Talan er um skattskylduga inntøku av virkseminum "frá smoltframleiðslu til sjógvaling og tøku."

Sambært semjuskjalinum skuldi lógaruppskotið um serskattaskipan leggjast fyri løgtingið í seinasta lagi í oktober, so serskatturi kann koma í gildi á nýggjárinum.

Ruth Vang

Ruth Vang, landsstýriskvinna í fíggjarmálum. 

Hækkaður fýra prosent

Nú uppskotið er borið í tingið, eitur serskatturin ikki átta prosent, men 12 prosent.

Og orðingin í semjuskjalinum er eisini broytt.

Í grein-30-c í lógaruppskotinum stendur at "inntøku frá vinnuligari alivinnu í Føroyum verður álagdur ein eykaskattur upp á 12 prosent av skattskyldugari inntøku frá aling av fiski á sjónum. 

Í stk.2 í somu grein verður nágreinað, at til skattligu inntøkuna telist ikki inntøka frá 

-framleiðslu av fiskamjøli, lýsi og alifóðri
-smoltframleiðslu
-tøku
-tænastuskipum til aling
-kryvjing og
-virðisøking í framleiðsluni

Sambært viðmerkingunum til lógaruppskotið skal eykaskatturin geva millum 80 og 100 milliónir krónur í inntøku um árið.

Eykaskatturin kemur í gildi 1. januar, og verður galdandi fyri árið 2025. Tað merkir, at fyrsta inntøkan kemur í landskassan í 2026.

Les uppskotið her.