Framvegis fá arbeiðsleys

Arbeiðsloysið er framvegis lítið.

Tað var 0,8 prosent í oktober, tað sama sum í oktober í fjør.

0,8 prosent svara til 255 fulltíðararbeiðsleys. 

Fulltíðararbeiðsleys eru tey, sum eru arbeiðsleys allan mánaðin. 

Tað merkir, at eru tvey fólk arbeiðsleys ein hálvan mánað hvørt, telja bæði samanlagt sum eitt fulltíðararbeiðsleyst fólk.

Í oktober rakti arbeiðsloysi 305 fólk.

Færri kvinnur

Arbeiðsloysið er minkað hjá kvinnum.

Tað var 0,1 prosentstig minni í oktober í ár enn tað var í oktober í fjør.

Hjá monnum var tað øvugt, 0,1 prosentstig størri í ár. 

Trettan prosent eru langtíðararbeiðsleys.

Tey 40 fólkini, sum eru tað, hava verið arbeiðsleys í meira enn eitt ár.