Strandferðslan leitar eftir avloysaraskipi fyri Smyril

Tá ið Smyril fer í dokk næsta summar, verður tað kanska ein ferja av Isle of Man, sum fer at røkja suðuroyarsiglingina.

Tað sæst í svari frá Strandferðsluni til spurningar frá fíggjarnevndini hjá løgtinginum.

Í sambandi við fíggjarlógarviðgerðina hevur fíggjarnevndin spurt, hvat avloysaraskip Strandferðslan fer at hyggja at í næstum.

Strandferðslan svarar, at tey fara at hyggja at einum skipi á Isle of Man, ið kallast "Ben My Chree". 

Skipið tekur 500 ferðafólk og 200 persónbilar. Manningin telur 28 fólk.

Smyril tekur 800 ferðafólk um veturin og 975 um summarið. Smyril tekur 200 persónbilar.

Sambært BBC á Man fer tað at kosta 18 milliónir pund, 162 mió. kr., at uppstiga "Ben My Chree", sambært Alex Allinson, ráðharra.