Tvey sovið í brummuni

- Í nátt vóru tað nøkur fólk, sum ikki dugdu sær hógv, sigur vakthavandi á politistøðini í Havn.

Í gjárkvøldið fór politiið á eitt gistingarhús, tí ein maður var ólátaður har. Tað bleiv tosað við mannin, sum fekk boð um at fara av staðnum.

Tvey onnur fólk vórðu tikin við á støðina, tí tey vóru ólátað. Fyrst dugdi ein maður sær ikki hógv í Klubbagarðinum, og tá tað ikki bar til hjá politiinum at tosa mannin til rættis, bleiv hann tikin við á støðina.

Seinni var ein kvinna so mikið ólátað móti politiinum, at hon bleiv eisini tikin við á støðina.

- Tey bæði sleppa at liggja eina løtu aftrat, sigur vakthavandi, og tá tey vakna, so fáa tey eina bót upp á 1.500 krónur í part.

Koyrikort upp á spæl
Í gjár fekk ein bilførari í Klaksvík bót, tí at eitt barn í bilinum ikki sat íbundið, og ein annar bilførari í Klaksvík fekk bót fyri at tosa í fartelefon, meðan hann koyrdi bil.

Millum Fjarða í Eysturoynni fekk ein bilførari 2.500 krónur í bót, tí hann varð tikin fyri at koyra 115 km/t, har mest loyvda ferð er 80 km/t. Bilførarin missur koyrikortið treytað og má upp til nýggja koyriroynd.