Universitetssjúkrahúsið kemur í lógina

Nú skal ásetast í lógini um Sjúkrahúsverkið, at tað skal gerast eitt universitetssjúkrahús.

Eitt universitetssjúkrahús hevur eisini gransking og útbúgving umframt at viðgera sjúklingar.

Gransking og útbúgving eru í tøttum samstarvi við eitt ella fleiri universitet. 

Eitt universitetssjúkrahús hevur eisini ta fakligu viðurkenning, sum krevst til at starvsfólk og granskarar kunnu vinna sær akademisk heiti við sínum virksemi har.

Í áliti um universitetssjúkrahús frá september í fjør verður sagt, at Sjúkrahúsverkið brúkar 0,15 prosent av játtan síni til heilsugransking og 0,58 prosent til undirvísing og útbúgving.

Í álitinum verður sagt, at miðað verður eftir, at Sjúkrahúsverkið innan sjey ár skal 
nýta eitt prosent til gransking og eitt prosent til undivísing og útbúgving.

Í 2024 var hálvonnur millión krónur sett av til universitetssjúkrahús, og næsta ár verður ein millión til universitetssjúkrahús.