Formaðurin í Grindamannafelagnum: "Grindafólk kenna seg svikin av Danmark"

So skjótt sum tíðindini bórust um, at Paul Watson var latin leysur, fóru telefonirnar hjá nevndarlimunum í Grindamannafelagnum at ringja. 

"Føroysk grindafólk eru á gosi og kenna seg ikki sørt svikin av donsku myndugleikunum, sum í flestu førum eru danska politiið í Føroyum, nú Paul Watson er latin leysur," sigur Esmar Joensen, formaður í Grindamannafelagnum. 

"Óteljandi dømi hava í summar verið í Føroyum um, at myndugleikarnir einki gera við mál ímóti aktivistum," sigur Esmar Joensen, formaður í Grindamannafelagnum.

Esmar Joensen sigur, at meðan aktivistarnir fyrr royndu at fáa føroyingar at leypa framav, so teir kundu fáa góðar myndir av tí, hava teir nú broytt framferð:

"At aktivistar bróta lógina, fær ongar avleiðingar, men tá ið aktivistar melda grindafólk fyri brot á djóraverndarlógina, skulu tey til avhoyringar og standa til svars," sigur hann.