Sandoyartunnilin roynst væl

Beint fyri jól var eitt ár síðan Sandoyartunnilin læt upp. Hetta var ein stórhending fyri sandoyingar, tí tað broytti ferðingarmynstrið hjá teimum grundleggjandi.

Nú bar til hjá teimum sjálvum at sleppa at gera av, nær tey fóru av oynni og í oynna aftur, og stór hevur ferðslan í Sandoyartunlinum eisini verið hetta fyrsta árið.

Síðan 1. januar í ár hava umleið 340.000 bilar koyrt ígjøgnum tunnilin og tað gevur eitt miðaltal upp á umleið 930 bilar um samdøgrið.

- Tað er næstan tríggjar ferðir so nógv sum roknað varð við áðrenn mann fór undir tunnilin, sigur Teitur Samuelsen, stjóri í partafelagnum Eysturoyar- og Sandoyartunlar.

Pumpurnar úr at gera
Streymurin er tann størsta einstaka rakstrarútreiðslan í Sandoyartunlinum, og tað skyldast pumpurnar, ið skulu pumpa vatnið, sum rennur inn í tunnilin, útaftur. Talan er um góðar tvær milliónir litrar um samdøgrið.

Tá ið tunnilin var fyrireikaður, roknaði felagið við eini inntøku uppá umleið 10 milliónir krónur, sum eisini svarar til tað, sum hann kostar at reka.

- Men økta ferðslan ger, at inntøkurnar nú eru næstan trífaldaðar og tað bøtir heilt fitt um rakstrarðurslitið hjá Sandoyartunlinum, sigur tunnilsstjórin.

Her kanst tú hoyra samrøðu við Teit Samuelsen: