Nógv meira tollfrítt keypt

Tollfría sølan av rúsdrekka er vaksin nógv seinastu 10 árini. 

Hon var 14.903 alkoholitrar í 2013 og 28.814 litrar í 2023.

Vøksturin er 93 prosent.

Til samanberingar vaks innlendissølan, tað er tað, sum ikki er tollfrítt, 75 prosent.

Tað sigur ársfrágreiðingin hjá Rúsdrekkasølu landsins fyri 2023.

Serliga er sølan vaksin nógv, tá talan er um reint alkohol í víni.

Hon var 3.407 litrar í 2013.

Hon var næstan trífalt størri í 2023, tá hon var 9.421 litrar av reinum alkoholi.

At stórur vøkstur er í tollfríari sølu nýtist tó ikki at merkja, at nýtslan er vaksandi. 

Talan kann vera um, at nógv tollfrí søla, sum fyrr var í Kastrup og øðrum floghavnum uttanlands, nú er á flogvøllinum í Vágum, stendur í ársfrágreiðingini hjá Rúsdrekkasøluni.