Friðarráðstevna um Sýria útsett

Eingin altjóða friðarráðstevna um Sýrialand verður í november. Tað siga keldur, sum standa russisku tíðindastovuni, Itar-Tass nær.

Í gjár hittust amerikanski og russiski varauttanríkisráðharrin við ST-sendimannin fyri Sýria, Lakhdar Brahimi, í Geneve, fyri at fáa greiðu á, nær friðarráðstevnan skal vera. Úrslitið var, at ráðstevnan ikki verður fyrr enn í desember.

Assad skal frá

Russiski uttanríkisráðharrin, Sergej Lavrov, sigur, at uppreistrardeildirnar í Sýria, hava sett krøv, sum ikki eru í samsvari við ætlanina við friðarráðstevuni. Hann sigur, at andstøðan hevur kravt, at Iran ikki sleppur við á ráðstevnuna, og at Bashar al-Assad, forseti, leggur frá sær.

Russland og USA vóru annars samd um, at eingi krøv skuldu setast fyri friðarráðstevnuna, sigur Lavrov. Stórveldini samdust í mai um eina friðarráðstevnu um Sýria, men fleiri ósemjur og nýtsla av eiturvápnum hava steðgað ætlanini higartil.

Seinni hevur ST gjørt eina avtalu við Assad, forseta, um, at øll eiturevnavápn skulu beinast av vegnum í seinasta lagi í 2014.