Ungarn tekur seg úr ICC

Ungarn fer at taka seg burtur úr altjóða revsidómstólinum, ICC.

Tað segði ungarski forsætisráðharrin, Viktor Orban, á tíðindafundi í dag.

Tíðindafundin helt hann saman við ísraelska forsætisráðharranum, Benjamin Netanyahu, sum hevur verið á almennari vitjan í Ungarn.

Altjóða revsidómstólurin hevur givið boð um at handtaka Netanyahu, sum er ákærdur fyri krígsbrotsverk.

Dómstólurin ov politiskur

Men Viktor Orban hevur langt síðani boðað frá, at tað fer Ungarn ikki at gera. Og nú fer hann at taka Ungarn úr altjóða dómstólinum. Grundgevingin er, at dómstólurin er vorðin ov politiskur.

Nú Ungarn fer úr ICC, hevur dómstólurin 124 limalond.

Ísrael er ikki limur í ICC, men palestinska sjálvstýrið er, og tí kann ICC sambært dómstólinum sjálvum rættarsøkja Netanyahu.