200.000 krónur til Filipsoyggjarnar

Karsten Hansen, landsstýrismaður, sum umsitur pengarnar hjá landsstýrinum til neyðhjálp, hevur gjørt av, at 200.000 krónur skulu latast til Filipsoyggjarnar.

Neyðhjálpin, sum almennu Føroyar nú veitir, verður latin Reyða Kross Føroya, sum síðani sendir hana til neyðhjálpararbeiðið í Filipsoyggjunum.

Endamálið við stuðulsupphæddini skal vera at veita bráðfeingis hjálp til tey mongu, ið eru komin í neyð av ódnini, sigur landsstýrismaðurin í tíðindaskrivi.

Ódnin sum rakti Filipsoyggjarnar um vikuskiftið, er tann harðasta sum nakrantíð hevur rakt land. Vindferðin var einar 88 metrar um sekundið, og í hvirlunum uppí 110 metrar um sekundið, upplýsa myndugleikarnir.

Enn er ógreitt, hvussu nógv fólk hava latið lív í ódnini, men fyribils metingar siga í minsta lagi 10.000 deyð og fleiri enn 11 milliónir fólk er rakt av ódnini so ella so.

ST heitur í dag á heimssamfelagið at lata 301 milliónir dollarar, ella 1,7 milliardir krónir, til neyðhjálpararbeiði í økinum.