Foreldur í Vága kommunu eru stúrin um trygdina hjá skúlabørnum

Foreldur í Vága kommunu harmast, at børn í 5. flokki og uppeftir ikki verða koyrd heim eftir skúlatíð í skúlabussinum, tí tey stúra fyri trygdini hjá børnunum. 

"Børnini noyðast at ganga heim fram við høvuðsvegnum, og tað er har, øll ferðsla til og frá flogvøllinum er," greiðir Høgni Joensen, ið er foreldur at børnum í skúlanum á Giljanesi, frá. 

Eitt uppskot um at broyta skipanina, so at hon eisini fevnir um børnini frá 5. flokki og uppeftir, var fyri í býráðnum herfyri.

Men uppskotið varð einmælt kolldømt av trivnaðarnevndini og býráðnum í Vága kommunu.

"Uppskotið var ov kostnaðarmikið," sigur Bjarni Prior, borgarstjóri í Vága kommunu.

Bøta um verandi skipan

Borgarstjórin greiðir frá, at hóast uppskotið fall, verður kannað um man kann bøta um verandi skúlabusskoyringina innan fyri teir galdandi fíggjarligu karmarnar.

Harumframt er ein onnur ætlan ávegis, sum snýr seg um at gera eina gøtu til børnini burtur frá vegnum. Ætlanin væntast at verða klár seinni í ár.

Hoyr innslag í tíðindunum: