Fólkatalið í Føroyum nærkast 55.000

1. apríl í ár búðu 54.845 fólk í Føroyum. Tað eru 0,6 prosent meira enn 1. apríl í fjør.

311 fólk komu aftrat hetta árið.

Harvið restar lítið í, at fólkatalið í Føroyum fer upp um 55.000. 

Minni vøkstur

Vøksturin er minni enn hann var frá 2023 til 2024, tá hann var 0,7 prosent.  

Fólkavøksturin, sum tók dik á seg í 2014, náddi toppinum á sumri í 2019, tá fólkatalið vaks 1,8 prosent uppá eitt ár. 

Síðan tá er fólkavøksturin støðugt minkaður niður í ein triðing, skrivar Hagstovan.

Burðaravlopið og nettoflytingin fyltu á leið hvør sína helvt av vøkstrinum seinasta árið.