Kanning: Pensjónsaldurin skal vera milum 65 og 67 ár

Minni enn 10. hvør føroyingur heldur, at pensjónsaldurin skal hækka upp í 70 ár, vísir ein nýggj kanning. 

Ætlanin hjá landsstýrisflokkunum at hækka pensjónsaldurin upp í 70 ár er mest umrødda politiska málið seinastu tíðina, og flest øll fakfeløg vendu sær ímóti ætlanini.

Landsstýrisflokkarnir samtyktu við aðru viðgerð í Løgtinginum tann 30. apríl at broyta verandi pensjónslóg og hækka pensjónsaldurin upp í 70 ár í stigum næstu 15 árini.

Men hesum hava landsstýrisflokkarnir ikki undirtøku fyri, vísir ein kanning, sum spyr.fo. hevur gjørt fyri starvsmiðilin Alfred.

67 ár

Um vit taka øll fólk í kanningini undir einum, siga 270 fólk, at pensjónsaldurin skal vera 67 ár, og 208 siga, at hann skal vera 65 ár. 

115 av teimum spurdu siga, at pensjónsaldurin skal vera 60 ár, men bara 84 fólk halda, at pensjónsaldurin skal hækkast upp í 70 ár.

Í meðal halda tey spurdu, at pensjónsaldurin skal vera 65,8 ár.

Kanningin er eisini býtt upp í kvinnur og menn, aldursbólkar, landafrøðilig øki og so eftir starvi. 

Munurin millum bólkarnar er ikki stórur. Tó hella menn til hægri pensjónaldur enn kvinnur. Teir siga 66 ár, og tær siga 65,5 ár. 

Tey við fólkaskúla halda, at pensjónsaldurin skal vera 66 ár, og tey við hægri útbúgving siga, at eftirlønaraldurin skal vera 66,6 ár. 

Aðrir útbúgvingarbólkar - miðnám, handverk og miðallangar útbúgvingar - siga, at pensjónsaldurin skal vera millum 65,2 og 65,6 ár.

Búskaparráðið mælir til 70 ár

Búskaparráðið hevur í fleiri ár sagt, at neyðugt er at hækka pensjónsaldurin fyri at fáa haldføri í búskapin.

Landsstýriskvinnan í fíggjarmálum, Ruth Wang, setti tí sum treyt fyri Suðuroyartunlinum, at pensjónsaldurin skuldi hækka upp í 70 ár.

Tá tingið kom saman herfyri, tók landsstýrismaðurin í almannamálum, Eirikur í Jákupsstovu, uppskotið aftur. Almannamálaráðið skal arbeiða við pensjónsmálinum.

1027 fólk frá 18 til 67 ár svaraðu spurninginum í kanningini hjá spyr.fo.