Skrivstovufólk tey fyrstu at meta førleikan

Yvir 100 fólk eru førleikamett, síðani førleikametingin byrjaði í 2018.

Men byrjanin var trek.

Neyðugt var at gera lógarbroytingar, so landsstýrisfólkið kundi hækka aldursmarkið og áramálið fyri starvsroyndir, tí vinnan bar ótta fyri, at fakligu krøvini í yrkisútbúgvingunum fóru at minka.

Tað sigur Djóni Nolsøe Joensen, landsstýrismaður, í svari til Honnu Jensen, løgtingskvinnu.

Higartil eru førleikametingar gjørdar í útbúgvingum hjá skrivstovufólki, føðsluatstøðingum, kokkahjálparum, húsasmiðum, skipsatstøðingum, heilsuhjálparum og námsfrøðihjálparum.

Eisini eru førleikametingar gjørdar í sambandi við, at miðnámsskúlalærarar hava tikið námsfrøðiútbúgving á Fróðskaparsetrinum, sigur landsstýrismaðurin.

Lítið arbeiðsloysi

Millum annað sera lítla arbeiðsloysið ger, at tørvurin á at spyrja um førleikameting, ella lata seg førleikameta, er ikki so stórur.

Endamálið við lógini um førleikameting er at geva fólki, 25 ár og eldri, í sambandi við útbúgving ella arbeiði møguleika fyri førleikameting, sum tekur atlit at øllum førleikum.

Tað eru førleikar, sum eru viðkomandi fyri at fara undir ávísa útbúgving ella arbeiði.

Støði skal takast í førleikum, sum eru fingnir í skúlaskipan, arbeiðslívi, frítíðarvirksemi ella á annan hátt.

Fyrstu førleikametingarnar vóru fyrireikaðar í 2018, tá 15 skrivstovufólk á almennum stovni søktu um at vera førleikamett. 

11 teirra vóru førleikamett í 2019 og fingu prógv sum skrivstovufólk.