Aftur átalu frá Umboðsmanninum

Átalan er fyri ikki at svara einari innlitsumbøn.

Tað var eitt áhugafelag, sum hevði biðið um eitt innlit hjá Arbeiðs- og brunaeftirlitinum. Men áhugafelagið fekk onki svar, heldur ikki kvittan fyri, at málið var móttikið. Ikki fyrr enn hálvan fjórða mána seinni kom eitt svar, sum segði, at stovnurin ikki hevði skjøl fevnd av innlitsumbønini.

Umboðsmaðurin sigur, at sambært innlitslógini hevur ein myndugleiki skyldu at avgreiða innlitsumbønir skjótast gjørligt og geva umsøkjara fráboðan, um so er, at ein innlitsumbøn ikki kann avgreiðast innan 10 dagar.

Herfyri var tað ein journalistur, sum heldur ikki fekk svar frá Arbeiðs- og brunaeftirlitinum. Heldur ikki, tá viðkomandi rykti eftir svari. Tá Umboðsmaðurin fór inn í málið, fekk hon í fyrstu atløgu heldur ikki svar frá Arbeiðs- og brunaeftirlitinum. Hetta málið fekk stovnurin eina álvarsama átalu fyri.

Arbeiðs- og brunaeftirlitið sigur, at tey nú hava bøtt um sínar innanhýsis arbeiðsgongdir, soleiðis at støður sum hesar frameftir ikki skulu koma fyri í málum um innlit.