Leigulógin og lógin um Húsalánsgrunnin skulu dagførast

Nú er stundin komin at dagføra leigulógina, heldur landsstýrið.

Lógin kom í 2010.

Men stórar broytingar eru hendar á leigumarknaðinum síðani tá, sigur landsstýrið. Lógin verður tí dagførd.

Leigusáttmálar og frágreiðingar um innflytingar skulu kunnu avgreiðast talgilt. Og reglur um mishald vera tillagaðar.

Haraftrat vera heimildir, mannagongdir og virkisføri hjá Leigunevndini endurskoðað. 

Uppskotið um dagføringar í leigulógini verður lagt fyri tingið í vár, stendur í løglistanum hjá landsstýrinum.

Húsalánsgrunnurin eisini dagførast

Lógin um Húsalánsgrunnin skal eisini dagførast næsta vár, ætlar landsstýrið.

Viðurskifti um almenna bústaðabygging og bústaðaumsiting vera nágreinað.

Greiðari reglur skulu gerast um, hvussu húsaleigan verður ásett. Og reglur um útleigan til ávísar málbólkar vera eisini ásettar. 

Eisini skal uppskotið áseta, um Húsalánsgrunnurin skal vera í fíggjarlógini og landsroknskapinum ella ikki.