Flyta ikki bilar á kalsoyarleiðini í eina viku

Frá mánadegnum 11. august og í eina viku ber ikki til at fáa bil í Kalsoynna ella úr Kalsoynni.

Strandferðslan boðar frá, at frá mánadegi 11. august og væntandi til og við sunnudagin 17. august, verður nýggj rampa sett upp við bryggjuna á Syðradali.

Meðan arbeitt verður, ber ikki til at flyta akfør millum Klaksvík og Syðradal á Kalsoynni. Allar bíleggingar av akførum í hesum tíðarskeiði, íroknað eyka ferðandi í somu bílegging, vera strikaðar, og peningurin afturgoldin innan nakrar dagar, skrivar Strandferðslan.

Kunnu koyra við Bygdaleiðum

Til ber framvegis at bíleggja vanligan ferðaseðil. Í Kalsoynni ber til at ferðast við Bygdaleiðum, og busssamband er til allar komur og fráferðir av Syðradali.

Ætlanin er, at Teistin skal røkja kalsoyarleiðina, tá ferjulegan á Syðradali er klár. 

Arbeiðið at gera nýggja rampu á Syðradali byrjaði týsdagin 10. juni.

Sagt varð tá, at arbeiðið fór at taka átta vikur. Nú vísir tað seg, at arbeiðið hevur tikið eitt sindur longur tíð.