Trætan um Galaxy: Gerðarrætturin verður settur klokkan 16 hósdagin

Klokkan 16 seinnapartin hósdagin verður fundur settur í Fasta gerðarrættinum í sambandi við, at lønardeildin hjá Fíggjarmálaráðnum hevur kært Maskinmeistarafelagið og Skipara- og navigatørfelagið fyri óheimilað stríðsstig. Tað hevur lønardeildin gjørt, tí hon metir ikki, at fakfeløgini hava rætt til at nokta limum sínum at mynstra við Galaxy, sum skal avloysa Smyril á Suðuroyarleiðini, meðan hann er í nokk.

Eftir reglunum skal gerðarrætturin koma við sínum úrskurði í seinasta lagi leygarmorgunin klokkan níggju. Men hesaferð verður tað bara ein fyribils niðurstøða. Orsøkin er, at gerðarrætturin eftir í kvøld ikki longur er fult mannaður.

Ógegnigur dómari
Tá fyrireikandi fundurin varð settur í skúlastovuni hjá ALS á Tinghúsvegnum í Havn klokkan níggju í kvøld, boðaði Leivur Michelsen, sum er dómsmaður umboðandi arbeiðsgevararnar, frá at hann svimur saman við stjóranum á Strandfaraskipum Landsins tríggjar ferðir um vikuna, og at tað møguliga kann fatast sum ein gegnistrupulleiki.

Rætturin viðgjørdi hendan spurnigin, og tá manningarfeløgini førdu fram, at hetta er ein trupulleiki, so varð hetta tikið til eftirtektar.

20250813_210027.jpg

Øll eru uttanlands
Tað eru átta limir í gerðarrættinum, sum kunnu sita sum dómarar, og tað skulu vera tríggir dómarar til eitt mál. Eitt forfólk og so ein frá ávíkavist arbeiðsgevarunum og arbeiðstakarunum. Men av tí, at summartíð er, so ber ikki til hjá rættinum at telja upp í trý í hesum málinum.

Tískil verður ein serlig grein í reglugerðini brúkt, sum sigur, at rættarformaðurin kan koma við einari fyribils niðurstøðu. Og soleiðis verður tað í hesum málinum. Tað verður Rannvá Signhild Ragnarsdóttir, sum leiddi fyrireikandi fundin í kvøld, sum einsamøll fer at taka støðu.

Vitnisfrágreiðingar tvær ferðir
Báðir partar hava boðað frá, at teir ætla at hava vitnisfrágreiðingar til fundin hósdagin. Men hesi vitni fara at verða innkallaði aftur um góðar tvær vikur. Tí hóast rættarforkvinnan kemur við einum fyribils úrskurði í seinasta lagi leygarmorgunin, so skal málið so at siga ganga umaftur, tá rætturin er fult mannaður. Tað verður um góðar tvær vikur.