Hall í bestu tíðum

Hóast føroyski búskapurin er í hákonjunkturi við høgum virksemi, metir Búskaparráðið, at bæði landskassin og kommunurnar hava stórt hall. Í 2025 verður hallið hjá landinum mett til 390 milliónir krónur, og samlaða hallið hjá landi og kommunum svarar til góð 2% av BTÚ.

Hetta er als ikki nøktandi, sigur búskaparráðið. 

Ráðið ávarar um, at tá fíggjarpolitikkurin er stimbrandi í góðum tíðum, ger tað, at búskapurin gerst ov heitur, at samfelagshjólini mala ov skjótt.

Sambært frágreiðingini hava politikarar víst ov lítið av dirvið til at fremja neyðugar nýskipanir og heldur brúkt “plenuklipparan”, sum eru ymisk sparitiltøk. Sambært játtanarkørmunum fyri 2026 er ætlanin at gera sparitiltøk á 55 mió. kr. í 2026 og 35 mió. kr. eftirfylgjandi ár. Hetta er ikki skynsom búskaparlig nýtsla, sigur formaðurin í Búskaparráðnum, Johnny í Grótinum. 

Eitt av tilmælunum frá Búskaparráðnum er harumframt, at seta í verk eitt fíggjarpolitiskt regluverk.