Sáttmálin longdur eitt ár við broytingum

Maskinmeistarafelagið og Føroya Reiðarafelag hava gjørt sáttmálasemju um fiskiskipini.

Talan er um leingjan av sáttmálanum til 1. apríl næsta ár, men tó við týðandi broytingum, boðar Maskinmeistarafelagið frá í tíðindaskrivi.

Tað hevur tikið sína tíð at koma fram til hesa semjuna, tí Maskinmeistarafelagið segði sáttmálan upp at fara úr gildi 1. apríl 2024. Nýggi sáttmálin kann sigast upp við tveir mánaða freist at fara úr gildi aftur longu 1. apríl næsta ár.

Reiðarafelagið og Maskinmeistarafelagið

 Hesir hava sitið við samráðingarborðið. Frá vinstru: Stefan í Skorini, stjóri í Føroya Reiðarafelag, Hanus Hansen, formaður í Føroya Reiðarafelag, Arnfinn Bech, formaður í Maskinmeistarafelagnum, og Regin M. Olsen, næstformaður í Maskinmeistarafelagnum. (Mynd: Maskinmeistarafelagið)

Lønin  betur nágreinað

Av broytingunum í sáttmálaásetingunum vigar tað nógv hjá Maskinmeistarafelagnum, at tað nú verður betur nágreinað í sáttmálanum, at arbeiðslønin hjá maskinmeistarum, sum arbeiða umborð millum túrar, bæði er pensjónsgevandi, og at frítíðarløn upp á 12 prosent skal roknast oman á hana.

Við semjuni eru sjey broytingar gjørdar í sjálvum sáttmálatekstinum, umframt at serreglur eru gjørdar fyri trolarar upp til 3.000 hestakreftir - sum eru útgjørd við skipanum til vaktfrí maskinrúm og bara hava ein maskinmeistara. Her skal heitið hjá maskinmeistaranum vera maskinstjóri.

Ruddiligari avrokning

Nýggja semjan tryggjar eisini ruddiligari viðurskifti í sambandi við avrokningina, tá makrelkvotur verða latnar millum skip.

Nýggja semjan sigur at: "Um manning er á tí latandi skipinum, skal manningin við ársbyrjan hava greið boð, um hon eigur lut í avrokning av tí makrelkvotu, ið annað skip fiskar.”

Øll sáttmálasemjan kann lesast her.