Løgmaður kunnar uttanlandsnevndina um avgerð í WTO-málinum

Serliga grein-6 nevndin, sum landsstýrið og danska stjórnin settu í felag í januar mánað, er nú komin til eina avgerð.

Uppgávan hjá nevndini var at greiða spurningin, um stjórnarskipanarliga støða Føroya loyvir Føroyum at gerast sjálvstøðugur limur í heimshandilsfelagsskapinum, WTO.

Í nevndini eru tvey embætisfólk úr landsstýrinum, tvey embætisfólk fyri donsku stjórnina og trý umboð fyri Hægstarætt.

Serliga nevndin fekk navnið "Grein-6 nevndin", tí hon er sett sambært grein-6 í heimastýrislógini.

Greinin ásetir, at tá ivamál eru um, hvørji viðurskifti hoyra undir føroyska heimastýrið, skulu hesi loysast í eini serligari nevnd. 

Lógargreinin er soleiðis orðað:

"Ivamál um føroyska heimastýrisins ræði í mun til ríkisvaldið verða løgd fyri nevnd, skipað av tveimum limum valdum av ríkisstjórnini, tveimum valdum av landsstýrinum og trimum av hægstarættarpresidentinum valdum hægstarættardómarum; ein teirra verður settur sum formaður. Eru teir fýra av ríkisstjórnini og landsstýrinum valdu limirnir samdir, er málið endaliga avgjørt. Um so ikki er, verður málið avgjørt av teimum trimum hægstarættardómarunum." 

Hetta er fyrstu ferð, at henda lógarheimild verður brúkt.

Aksel V. Johannesen, løgmaður, fer á middegi at kunna Uttanlandsnevndina hjá løgtinginum um, hvørja avgerð grein-6 nevndin hevur tikið, og í útvarpstíðindunum klokkan 12 verður samrøða við løgmann.