Ongan skund at avgreiða málið um tiltøk móti russiskum reiðaríum

Uttanlandsnevndin hjá løgtinginum hevur ongan skund at avgreiða uppskotið hjá landsstýrinum um tiltøk móti tveimum russiskum reiðaríum.

Í morgin hevur nevndin havt uppskotið í ein mánað.

Álit er ikki skrivað, og eingin nevndarfundur er ásettur.

Sambært tingskipanini skulu nevndir lata løgtinginum álit í seinasta lagi ein mánað eftir, at hon fekk málið.

Og tað áliggur nevndarformanninum at gera nevndararbeiðið skjótast gjørligt.

Løgtingsforfólkið kann leingja frestina eftir áheitan frá nevndarformanni.

Um álit ikki er komið innan frestina, er tingfólki heimilað skrivliga at krevja, at formaðurin setir spurningin til atkvøðugreiðslu, um tingviðgerðin skal halda fram, hóast einki álit er latið.