Skaðin hjá Brandi ikki so álvarsamur sum áður mett

- Eg skal binda frið í tríggjar til seks vikur, og tá kann eg væntandi verða klárur at venja ordiliga aftur.

Tað sigur A-landsliðsspælarin og NSÍ miðvallarin, Brandur Hendriksson Olsen, nú hann er skurðviðgjørdur í knænum, eftir at hann bleiv skaddur undir venjing hóskvøldið.

- Eg skuldi skjóta eitt skot undir venjing, har vinstra knæið hoknaði undan og læsti seg. Skanningin vísti, at meniskurin var farin og lá í klemmu. Tað var fyrst ætlanin at seyma meniskin aftur, men hann bleiv partvíst kliptur og tikin burtur, sigur skálavíkingurin í NSÍ.

Heilt ítøkiliga merkir tað, at Brandur nú hevur eitt sindur minni av meniski í knænum, sum merkir, at hann kemur skjótari fyri seg aftur, tí tað tekur minni tíð at lekja, men samstundis økir tað eitt lítið sindur um vandan fyri slit og pínu upp á longri sikt, tí meniskurin verjir knæið móti trýsti og sliti.

Harvið er skaðin ikki so álvarsamur, sum kanska vandi var fyri, og sum aðrir miðlar hava róð uppundir.

- Hetta er ikki tann mest álvarsami skaðin, men tá tað er triðja skurðviðgerðin í sama knæið, so er tað aldrin gott. Tað sigur seg sjálvt, sigur Brandur.

Brandur Hendriksson Olsen hevur slitið krossbandið tvær ferðir, og hesa ferð var tað galið við meniskinum, men hóast hetta, so er tað ikki nakað, sum tekur fótbóltshugin burtur.

- Nei, tað ger tað ikki. Eg kenni á mær, at eg havi meira at geva enn, so eg verið klárur at koyra á aftur so skjótt uppvenjingin er av, sigur miðvallageneralurin.