Minni partur av fólkavøkstrinum hevur ikki bústaðartilknýti

Tey, sum ikki hava bústaðartilknýti í Føroyum, gerast minni partur av fólkavøkstrinum. 

Frá 2022 til 2024 stóðu tey fyri góðari helvt av fólkavøkstrinum.

Men frá oktober í fjør til september í ár eiga tey ein triðing, skrivar Hagstovan.

Síðstu tíggju árini er parturin av fólkinum uttan bústaðartilknýti farin úr 1,7 upp í 5,1 prosent.

Tók dik á seg 2018

Vøksturin tók dik á seg í 2018 og var størstur í 2021 og 2022, tá tey uttan bústaðartilknýti áttu 85 prosent av fólkavøkstrinum. 

Fyri at hava føroyskt bústaðartilknýti skal fólk hava búð helvtina av lívinum ella sjey av 10 samanhangandi árum í Føroyum eina ferð í lívinum.

Í oktober vóru 2.822 fólk uttan bústaðartilknýti í Føroyum, størsta tal higartil. 

Í oktober 2010 til dømis vóru tey 903.