Jana ímóti Serbia: Her har og allastaðni

Tað eru 500 kilometrar úr Dortmund til Berlin.

Tá Jana Mittún í gjár stóð frammanfyri serbiska málverjanum í Westfalenhalle og skuldi skjóta brotskast í evstu løtu, var ikki sørt, at tú hómaði Elias Ellefsen á Skipagøtu í júst somu støðu í Mercedes-Benz Arena ímóti Norra fyri knøppum tveimum árum síðan.

Úrslitið var hitt sama. Jana Mittún gjørdi sum eldra systkinabarnið, setti bóltin í netið og tryggjaði Føroyum enn eitt stórt úrslit ímóti enn eini stórari hondbóltstjóð.

Ein ítøkilig mynd uppá, at fótfimi bakkurin úr Viborg hevur vunnið sær sama týdning fyri kvinnurnar, sum Kiel-spælskiparin hevur fyri menninar. Ikki bert við sínum stíli og spæli, men eins nógv sum ein framsøkin undangongukvinna, ið ikki bakkar fyri nøkrum.

 - Eg eri sjálvandi glað fyri javnleikin, men eg haldi, vit skuldu vunnið, segði Jana Mittún beint eftir, at hon hevði tryggjað Føroyum fyrsta stigið í einum miðumfari. Nakað soleiðis hevur hon sagt ikki so sjáldan síðstu árini, og millum annað tí flytur liðið seg fram.

Føroyar, Serbia, HM25, Dortmund, Jana Mittún

Eitt avriki í serflokki

Avrikið hjá Janu Mittún ímóti Serbia man teljast millum hennara bestu á landsliðnum. Ein slíkur dystur er framúr undir øllum umstøðum. Í gjár gjørdi Jana Mittún tað á størsta pallinum - við góðari hjálp frá liðfeløgunum.

LES EISINI: Ingi Olsen metir um spælaraavrikini móti Serbia

 Hondbóltsviðmerkjarin hjá Kringvarpinum undir HM-endaspælinum, Ingi Olsen, var eisini bergtikin av spælinum hjá orkuríka bakkinum úr Hoyvík. 

 - Orð eru fátøk, tá karakterur skal finnast til Janu. Ein brandur í dag. Tann orka, hon hevur. Koyrir á allan dystin á tamb, og sjálvandi tekur hon ábyrgd, tá seinasta brotskastið skal takast, skrivar hann.

Tølini siga sína týðiligu søgu. Jana Mittún skeyt 10 mál upp á 11 skotroyndir. Effektivitetur, sum viðhvørt hevur verið umbiðin frá evnaríka bakkinum, ið hevur lyndi til at misnýta ov illa. Afturat málunum átti hon eisini næstseinastu hon á trimum málum og vann Føroyum tvey brotskøst.

Samanløgdu hagtølini í kappingini higartil eru eisini hugtakandi. Føroyingurin hevur skorað ella lagt upp til samanlagt 48 mál, og hon liggur í løtuni ovast á listanum frammanfyri Lénu Grandveau úr Fraklandi og Sorinu-Maria Grozav úr Rumenia, sum hava 45 samanlagt.