USA lopið á Venesuela

USA hevur lopið á fleiri mál í suðuramerikanska landinum Venesuela í nátt.

Tað skrivar amerikanski forsetin, Donald Trump, á sosiala miðli sínum Truth Social.

Amerikanski forsetin skrivar eisini, at forsetin í Venesuela, Nicolás Maduro, er tikin saman við konu síni og flogin úr landinum.

Í uppslagi sínum leggur Trump aftrat, at tíðindafundur verður í Mar-a-Lago klokkan 11 amerikanska tíð, sum er klokkan 16 føroyska tíð.

Tað var tíðliga í morgun, at tað frættist, at USA hevði lopið á fleiri mál í Venesuela í nátt og at Nicolás Maduro, forseti, hevði boðað frá undantaksstøðu í landinum.

Politiskt stríð hevur verið millum USA og Venesuela í longri tíð.

USA hevur síðstu mánaðirnar framt álop á bátar, og meira enn hundrað fólk hava latið lív í álopunum. Talan er um bátar, sum sambært USA, smugla rúsevni.

Eisini hevur USA lagt hald á fleiri oljutangaskip.

Venesuela hevur heimsins størstu oljugoymslur og framleiðir okkurt um eina millión tunnur um dagin.